English 
Kinyarwanda 
Editor
![Ngoma:Aba Ofisiye bakuru bo mu bihugu 9 basuye akarere banitabira umugoroba w'umuryango[AMAFOTO]](https://realrwanda.rw/uploads/images/2026/02/image_750x_69a072f3d0002.jpg)
Itsinda ry'aba ofisiye bakuru biga mu Ishuri Rikuru rya Polisi (NPC) riherereye mu Karere ka Musanze baturuka mu bihugu 9 bagiriye urugendoshuri mu Karere ka Ngoma banitabira umugoroba w'umuryango mu mirenge ya Kibungo na Murama bahakura ubumenyi bwiyongera ku bwo biga mu ishuri.
Kuri uyu wa Kane, tariki ya 27 Gashyantare 2026 nibwo Iri tsinda ryari riyobowe n’Umuyobozi CP Christophe Bizimungu,ryagiriye urugendo mu karere ka Ngoma.
Ni urugendo rwari rugamije guhuza amasomo bigira mu ishuri n’imikorere y’inzego z’ibanze mu kubaka amahoro no gukemura amakimbirane hashingiwe ku bufatanye n’abaturage.
Urugendoshuri rwari rufite insanganyamatsiko igira iti: “Gushimangira uburyo bushingiye ku muryango mu gukemura amakimbirane hagamijwe amahoro n’umutekano birambye.”
Urugendoshuri rwibanze ku nkingi eshatu z’ingenzi: imikorere y’Abunzi, Inteko z’Abaturage n’Imigoroba y’Imiryango nk’inzira zifasha gukemura ibibazo bitaragera mu nkiko no kwimakaza ubumwe mu muryango nyarwanda.
Umuyobozi w’Akarere ka Ngoma Niyonagira Nathalie yashimiye ubuyobozi bw’ishuri rya Polisi rya MUSANZE bwahisemo kuza kwigira ku Karere ka Ngoma ashimangira ko amahoro arambye atangirira mu muryango no mu mudugudu.
Yagize ati: “Iyo abaturage bahabwa ijambo kandi bakagira uruhare mu kwishakira ibisubizo, amakimbirane akemuka hakiri kare kandi bikagabanya ibyaha n’imitwaro ku nzego z’ubutabera.”
CP Christophe Bizimungu yavuze ko uru rugendoshuri ari ingenzi mu gufasha abanyeshuri gusobanukirwa uko amasomo biga ashyirwa mu bikorwa mu gukemura amakimbirane.
Yagize ati: “Kwiga uburyo abaturage ubwabo bagira uruhare mu gukemura amakimbirane bituma abapolisi barushaho gusobanukirwa ko umutekano urambye wubakwa binyuze mu bufatanye n’abaturage.”
Nyuma y’ibiganiro ku rwego rw’Akarere, iri tsinda ryasuye imirenge ya Murama na Kibungo, aho baganiriye n’abaturage ku mikorere y’Umugoroba w’Umuryango, Abunzi ndetse na gahunda ya Mvura Nkuvure, barebera hamwe uko izi gahunda zigira uruhare mu gukemura amakimbirane no gukomeza kubaka umuryango ushoboye kandi utekanye.
Iri tsinda rigizwe n’aba ofisiye baturuka mu bihugu bitandukanye birimo Repubulika ya Santrafurika, Eswatini, Gambia, Malawi, Namibia, Somalia, Sudani y’Epfo, Uganda n’u Rwanda, biga amasomo ajyanye n’amahoro no gukemura amakimbirane.
